میرا تعلق کراچی سے ہے لیکن اسے کرانچی نہیں کہتی۔ کراچی سے تعلق رکھنے والے دیگر لوگوں کی طرح اس شہر ستم گر پہ فدا ہوں۔ غالب کی طرح اس پہ یقین رکھتی ہوں، ایسا بھی کوئ ہے کہ سب اچھا کہیں جسے۔ ساری زندگی اچھا بننے کی پند و نصائح اور تربیت کے باوجود اب طبیعت ادھر نہیں آتی۔ وجہ نامعلوم۔ اکثر یہ احساس ہوتا ہے کہ بازیچہ ء اطفال ہے دنیا میرے آگے، لیکن میرا پسندیدہ کھیل چھپن چھپائ نہیں برف پانی ہے۔ جب حیرت کے مقامات سے گذرتی ہوں تو برف ہو جاتی ہوں لیکن جب حقائق کی حرارت پڑتی ہے تو پانی بن جاتی ہوں۔