Friday, March 16, 2012

لہو کے رنگ شخصیت پہ


آپ کسی کو پہلا پہلا محبت نامہ بھیجیں اور وہ یہ لکھ بھیجے کہ ہم دونوں کی راہیں ایک نہیں ہو سکتیں۔ میرے خون کا گروپ اے ہے اور آپکا او۔ جو لوگ  او گروپ رکھتے ہیں وہ مغرور ہوتے ہیں جبکہ اے گروپ والے۔۔۔۔۔۔۔۔۔۔۔۔۔۔۔ یہ پڑھتے ہی آپ اس دن کو لعنت بھیجیں گے جب یہ معلوم ہوا کہ خون ایک طرح کا نہیں ہوتا بلکہ اسکے گروپس ہوتے ہیں اسکے بعد آپ کسی جاننے والے کا نمبر کھڑکھڑائیں گے کہ یار ایک رپورٹ بنا دو جس میں میرا خون کا گروپ اے ہو۔
پریشان نہ ہو ہوں ایسا ہونے کے امکانات جاپان ، کوریا اور مشرق بعید میں ہی ہیں۔ جہاں بوڑھے سے لے کر بچے تک خون کے گروپ میں دلچسپی رکھتے ہیں۔  کیونکہ اس سے وہ مقابل کی شخصیت جاننا چاہتے ہیں۔ اس لئے آپ جتنی بار چاہیں محبت کی بازی کھیلئیے۔ ہم اور آپ تو یہی سمجھتے ہیں کہ خون کا گروپ صرف اس وقت معلوم ہونا ضروری ہے جب کسی انسان کو انتقال خون کی ضرورت پیش آجائے ورنہ  بیٹھ کر سکھ چین کی بانسری بجا۔

جاپان میں خون کا گروپ پوچھنے کی روایت لوگوں کے آسمانی برج پوچھنے سے زیادہ ہے حتی کہ بعض جگہ پہ ملازمت کی درخواست میں خون کا گروپ بتانا ضروری ہوتا ہے۔ ان میں سے بعض ممالک میں فیس بک اپنے استعمال کرنے والوں کو خون کے گروپ  کا آپشن بھی دیتی ہے، دوست ہوتا نہیں ہر ہاتھ ملانے والا۔
مزید باتوں سے پہلے ہم پہلے یہ دیکھ لیں کہ جاپانی خون کے مختلف گروپس کے بارے میں کیا رائے رکھتے ہیں۔ خون کہ یہ گروپس اے بی او نظام سے لئے جاتے ہیں یعنی  خون کی درجہ بندی کا وہ نظام جس میں خون کے بنیادی چار گروپس ہیں۔ اے، بی، او اور اے بی گروپس۔

اے گروپ؛
یہ گروپ رکھنے والے معتبر، ایماندار، با اصول،صابر، ذمہ دار ہوتے ہیں۔ انکی ایک اور خوبی اکملیت پسندی ہے یعنی کام کو اس طرح کرنا کہ اس میں کوئ کمی نہ رہ جائے۔ وہ باہر سے پر سکون نظر آتے ہیں لیکن اندرونی طور پہ مضطرب رہتے ہیں۔  یہ اچھی جمالیاتی حس رکھتے ہیں۔ اکثر شرمیلے اور حساس ہوتے ہیں۔
منفی خصوصیات؛ نازک مزاج، لوگوں سے کٹ کر رہنے والے، ضدی لوگ جو تناءو کا شکار ہو جاتے ہیں۔

بی گروپ؛
یہ بڑے مستحکم مزاج ہوتے ہیں۔اپنے اہداف حاصل کرنے میں جنون کی حد تک دلچسپی رکھتے ہیں۔ جو کام شروع کرتے ہیں اسے اپنے وقت میں بہترین طریقے سے ختم کر کے ہی دم لیتے ہیں۔ یہ گروپ رکھنے والے افراد زندگی اپنے طور پہ گذارتے ہیں۔
منفی خصوصیات؛ خود غرض، سست، معاف نہ کرنے والے، ناقابل بھروسہ، غیر ذمہ دار لوگ۔
اے بی گروپ؛
یہ خاصے دلچسپ لوگ ہوتے ہیں۔ قابل اعتبار، ایماندار لوگوں کی مدد کرنے پہ تیار، خوداعتماد۔ کہا جاتا ہے کہ یہ افراد دوہری شخصیات رکھتے ہیں۔ شاید اسکی وجہ یہ ہو کہ ان میں اے اور بی دونوں گروپ والے افراد کی خصوصیات پائ جاتی ہیں۔
منفی خصوصیات؛ ناقد، فیصلے کی صلاحیت سے محروم، خود غرض، گھٹیا لوگ۔
او گروپ؛
یہ گروپ رکھنے والے افراد بڑے تخلیق کار ہوتے ہیں۔ خوداعتماد اور مشہور ہوتے ہیں۔ انہیں مرکز نگاہ بننے میں مزہ آتا ہے۔ سماجی طور پہ متحرک یہ لوگ کسی کام کو شروع کرنے میں ہمیشہ پہل کا مظاہرہ کرتے ہیں۔ اس لئے کہا جاتا ہے کہ رہنمائ کے خواص رکھتے ہیں۔ یہ جو کام شروع کریں اسے ختم بڑی مشکل سے کرتے ہیں۔
منفی خصوصیات؛ باتونی، مغرور، حاسدی، غیر مہذب۔
اب ان خواص کو سامنے رکھتے ہوئے آپ بھی اندازہ لگا سکتے ہیں کہ کون سا خون کا گروپ کس کے ساتھ مطابقت رکھتا ہے۔
اے کے بارے میں کہا جاتا ہے کہ اے اور اے بی کے ساتھ خوشگوار تعلقات رکھتا ہے۔
بی، بی اور اے بی کے ساتھ بخوشی چلتا ہے
اے بی، ہر ایک کے ساتھ نبھا لیتا ہے۔ مزے کی بات یہ ہے کہ اے بی گروپ رکھنے والے افراد باقی دوسرے گروپ والوں کا خون بھی قبول کر سکتے ہیں اور یونیورسل ایکسیپٹر کہلاتے ہیں۔
اور گروپ رکھنے والے او اور اے بی کے ساتھ راضی بازی رہتے ہیں۔

سائینس، اس تمام تفصیل پہ کچھ خاص یقین نہیں رکھتی اگرچہ کہ اس ضمن میں ڈیٹا اکٹھا کر کے نتائج نکالنے کی کوشش کی گئ لیکن چند ایک حقائق کے علاوہ کچھ ثابت نہ ہو سکا۔
توہم پرستی اور عقیدے میں اتنا ہی معمولی فرق ہے ایک کو جانچنے کی کوشش کی جا سکتی ہے دوسرے کے بارے میں یہ سوچنا بھی محال ہے۔
نیچے چارٹ میں دئیے گئے ممالک میں خون کے مختلف گروپس کے پائے جانے کی شرح موجود ہے۔ اور اس سے آپ بھی اندازہ کر سکتے ہیں کہ یہ وہم کس حد تک درست ہوسکتا ہے۔
کیونکہ اس سے ایک بات پتہ چلتی ہے وہ یہ کہ او گروپ ساری دنیا میں کثیر تعداد پایا جاتا ہے۔ لیکن کیا اسی شرح سے خود اعتماد اور مشہور لوگ بھی پائَے جاتے ہیں ایسے لوگ جو پہل کرنے میں آگے ہوں؟

ملک آبادی O+ A+ B+ AB+ O- A- B- AB-
آسٹریلیا 21,262,641 40.0% 31.0% 8.0% 2.0% 9.0% 7.0% 2.0% 1.0%
آسٹریا 8,210,281 30.0% 33.0% 12.0% 6.0% 7.0% 8.0% 3.0% 1.0%
بیلجیئم 10,414,336 38.0% 34.0% 8.5% 4.1% 7.0% 6.0% 1.5% 0.8%
برازیل 198,739,269 36.0% 34.0% 8.0% 2.5% 9.0% 8.0% 2.0% 0.5%
کینیڈا 33,487,208 39.0% 36.0% 7.6% 2.5% 7.0% 6.0% 1.4% 0.5%
زیک ریپبلک 10,532,770 27.0% 36.0% 15.0% 7.0% 5.0% 6.0% 3.0% 1.0%
ڈنمارک 5,500,510 35.0% 37.0% 8.0% 4.0% 6.0% 7.0% 2.0% 1.0%
ایسٹونیا 1,299,371 30.0% 31.0% 20.0% 6.0% 4.5% 4.5% 3.0% 1.0%
فن لینڈ 5,250,275 27.0% 38.0% 15.0% 7.0% 4.0% 6.0% 2.0% 1.0%
فرانس 62,150,775 36.0% 37.0% 9.0% 3.0% 6.0% 7.0% 1.0% 1.0%
جرمنی 82,329,758 35.0% 37.0% 9.0% 4.0% 6.0% 6.0% 2.0% 1.0%
ہانگ کانگ 7,055,071 40.0% 26.0% 27.0% 7.0% 0.3% 0.2% 0.1% 0.1%
آئس لینڈ 306,694 47.6% 26.4% 9.3% 1.6% 8.4% 4.6% 1.7% 0.4%
انڈیا 1,166,079,217 36.5% 22.1% 30.9% 6.4% 2.0% 0.8% 1.1% 0.2%
آئر لینڈ 4,203,200 47.0% 26.0% 9.0% 2.0% 8.0% 5.0% 2.0% 1.0%
اسرائیل 7,233,701 32.0% 34.0% 17.0% 7.0% 3.0% 4.0% 2.0% 1.0%
نیدر لینڈز 16,715,999 39.5% 35.0% 6.7% 2.5% 7.5% 7.0% 1.3% 0.5%
نیوزی لینڈ 4,213,418 38.0% 32.0% 9.0% 3.0% 9.0% 6.0% 2.0% 1.0%
ناروے 4,660,539 34.0% 42.5% 6.8% 3.4% 6.0% 7.5% 1.2% 0.6%
پولینڈ 38,482,919 31.0% 32.0% 15.0% 7.0% 6.0% 6.0% 2.0% 1.0%
پرتگال 10,707,924 36.2% 39.8% 6.6% 2.9% 6.0% 6.6% 1.1% 0.5%
سعودی عرب 28,686,633 48.0% 24.0% 17.0% 4.0% 4.0% 2.0% 1.0% 0.3%
جنوبی افریقہ 49,320,000 39.0% 32.0% 12.0% 3.0% 7.0% 5.0% 2.0% 1.0%
اسپین 40,525,002 36.0% 34.0% 8.0% 2.5% 9.0% 8.0% 2.0% 0.5%
سوِئیڈن 9,059,651 32.0% 37.0% 10.0% 5.0% 6.0% 7.0% 2.0% 1.0%
ترکی 76,805,524 29.8% 37.8% 14.2% 7.2% 3.9% 4.7% 1.6% 0.8%
برطانیہ 61,113,205 37.0% 35.0% 8.0% 3.0% 7.0% 7.0% 2.0% 1.0%
ریاست ہائے متحدہ امریکہ 307,212,123 37.4% 35.7% 8.5% 3.4% 6.6% 6.3% 1.5% 0.6%











خون کے یہ گروپس کس طرح وجود میں آئے سائینس اس بارے میں اپنے نظریات رکھتی ہے لیکن کچھ سوالات ہم ضرور پوچھنا چاہیں گے۔
کیا تقسیم کرو حکومت کرو، یہ پالیسی خدا نے بھی اپنائ ہے۔ اس لئے بظاہر سرخ سیال نظر آنے والا  خون تک  جدا کر ڈالا۔؟
خون کے گروپس کیا خدا نے اس لئے بنائے ہیں کہ بیسویں صدی میں خون بیچنے اور خریدنے کا کاروبار ہو سکے؟
کیا یہ گروپ اس لئے بنائے گئے کہ انکی بنیاد پہ انسانوں کی خصوصیات معلوم کی جا سکیں؟
یا یہ انسان کے ارتقاء کے دوران وجود میں آئے؟

  

10 comments:

  1. اس کے متعلق خاور کا لکھا یهاں شائع هوا تھا
    http://www.pakistani.jp/khawar-5.html
    لیکن اپ کا لکھا لگتا هے که کسی محقق کا لکھا هے

    ReplyDelete
    Replies
    1. آپ نے تو خاصی تفصیل سے لکھا ہے۔ میری نظر سے پہلے نہیں گذرا تھا۔ یقین تھا کہ جاپان کا تذکرہ ہو اور آپ تبصرہ نہ کریں یہ ممکن نہیں۔

      Delete
  2. میر ے اوپر ت میرے خیال میں او پازیٹو کی خوبیاں اور خامیاں فٹ نہیں بیٹھتیں
    ویسے تو ابھی تک میرے سے تمام دنیا کی آبادی کو بارہ لاٹھیوں سے ہانکنا ہی ہضم نہیں ہوا کہ یہ خعنی معاملہ بھی آن ٹپکا

    ReplyDelete
  3. آپ نے قصہ چھیڑا ہے تو آپ ہی پہلے یہ بتائیں کہ آپ کی شخصیت کس حد تک آپ کے خون گروپ سے منسوب تفصیل پر پورا اترتی ہے؟

    ReplyDelete
    Replies
    1. اگرچہ مجھے یقین نہیں کہ جاپانیوں کا تجزیہ سو فی صد درست ہے لیکن ہماری حد تک خاصی صحیح ہے۔
      لیکن اگر یہ تجزیہ میں نے سولہ سال کی عمر میں پڑھا ہوتا تو یقیناً اسے غلط قرار دیتی۔ میں اپنے اندر خاصِ تبدیلیاں لائ ہوں۔ اس لئے یقین سے نہیں کہا جا سکتا کہ یہ خون کے گروپ کا کمال ہے یا میری اپنی ذات پہ تنقید کا۔
      اسے جاننے سے پہلے میں بھی سوچتی تھی کہ کیا خون کے گروپ کا انسان کی شخصیت یا صحت پہ اثر ہوتا ہے۔

      Delete
  4. بڑی دلچسپ پوسٹ ہے اور خاور کھوکھرکا لکھا بھی بہت ہی عمدہ ہے۔

    ReplyDelete
  5. جی ایک تو ہو گئی دست شناسی ، دوسرا خون شناسی ، ... آپ کے اعتقادات کی فہرست میں اور کیا کیا شامل ہے؟
    یہ بتائیے کہ بیچاری مذہب پرستی کا کیا قصور تھا ؟
    :) :)
    ہوسکتا ہے کہ آپ کہیں کہ میں ان سب پر اعتقاد نہیں رکھتی۔ تو پھر اتنی تفصیل ، اتنی معلومات ، اسقدر دلچسپی ؟ اعتقاد نہ سہی اعتقاد کی چاہت تو ہے۔
    :)

    ReplyDelete
  6. اس سے زیادہ معلومات میری مذہب کے بارے میں ہیں تو آپ نے مذہب پرستی کو کیوں نکال دیا۔
    شادی سے پہلے نہ میں نے خون کا گروپ معلوم کروایا نہ دست شناسی کی۔ آپ سے گفتگو کرنے سے پہلے میں نے آپکا خون کا گروپ معلوم نہیں کیا۔ اس لئتے آپ سے عقائد کے ضمن میں نہ رکھیں، دلچسپی کے ضمن میں رکھیں۔ مجھے کھانا پکانے، باغبانی، کپڑوں کی سلائ، بچوں کی تربیت، سیاحت، اور خدا جانے کس کس چیز سے دلچسپی ہے۔ آجکل ایک کتا لیا ہے اب کتا شناسی حاصل کر رہی ہوں۔ انسان جب تک جی رہا ہے کچھ نہ کچھ تو کرے گا۔ کچھ دلچسپ ہی سہی۔
    ویسے آپکے خون کا کیا گروپ ہے۔
    :)

    ReplyDelete
  7. مذہب پر آپ کی تنقید سے آگاہ ہوں۔ دست شناسی اور خون شناسی کو چھوڑ کر دلچسپی کے جن مشاغل کی فہرست آپ نے گنی ہے وہ عقائد کے زمرے میں نہیں آتے۔

    ڈوگی پال لیا ؟ کونسا ہے ؟ اب تک کوئی پوسٹ کیوں نہیں آئی اس پر ؟


    مجھ سے مل چکی ہیں۔ میری شخصیت اور خیالات سے کچھ کچھ آگاہی ہے۔ اپنی پوسٹ میں لکھی تفصیل سامنے رکھتے ہوئے میرے گروپ کی نشاندہی کیجیے نا۔
    :)

    ReplyDelete
  8. ابھی اسے گنتی کے چند دن ہوئے ہیں۔ پہلے انکی خدمت گذاری کے اوقات اور انداز تو متعین ہو جائیں۔
    یہ ایک بیلجیئن شیفرڈ ہے۔
    نہیں اتنی معولمات کافی نہیں ہیں۔ درست جواب کے لئے آپکا خون ٹیسٹ کروانا ضروری ہے ۔
    :)

    ReplyDelete

آپ اپنے تبصرے انگریزی میں بھی لکھ سکتے ہیں۔
جس طرح بلاگر کا تبصرہ نگار کی رائے سے متفق ہونا ضروری نہیں، اسی طرح تبصرہ نگار کا بھی بلاگر کی رائے سے متفق ہونا ضروری نہیں۔ اس لئے اپنے خیال کا اظہار کریں تاکہ ہم تصویر کا دوسرا رخ بھی دیکھ سکیں۔
اطمینان رکھیں اگر آپکے تبصرے میں فحش الفاظ یعنی دیسی گالیاں استعمال نہیں کی گئ ہیں تو یہ تبصرہ ضرور شائع ہوگا۔ تبصرہ نہ آنے کی وجہ کوئ ٹیکنیکل خرابی ہوگی۔ وہی تبصرہ دوبارہ بھیجنے کی کوشش کریں۔
شکریہ